BUTUAN CITY – Misaka sa halos 200 milyones pesos ang damyos sa agrikultura tungod sa Habagat ug sa mga bagyong Luis ug Maymay.
Sumala sa nagpadayong assessment sa Department of Agriculture (DA), ang damyos nga mikantidad na sa 197.2 milyones pesos ang natala sa Ilocos Region, Cagayan, Central Luzon, CALABARZON, MIMAROPA, ug Western Visayas, diin 6,973 ka hektarya nga kaumahan ang naapektuhan.
Sa maong kantidad, ang humay nakasinati og 143.67 milyones pesos nga kantidad sa nadamyos.
Ang mga high-value crops nakatala usab og 30.27 milyones pesos nga damyos nga naglakip sa mga utanon, kapayas, ug saging.
Ang mais nakasinati usab og 4.65 milyones pesos nga damyos samtang sa mga pasilidad sa patubig (irrigation) ug mga istruktura sa umahan nakasinati usab og damyos nga nagkantidad og 16.1 milyones ug 2 milyones pesos.
Sigon sa ahensiya nga muabot sa 7,989 ka mag-uuma ang apektado kansa maka-avail og 110.5 milyones pesos nga kantidad sa mga farm input sama sa mga liso sa humay, mais, ug utanon.
Mahimo usab silang makahulam og hangtod ₱25,000 nga pautang gikan sa Survival and Recovery (SURE) Loan Program sa Agricultural Credit Policy Council (ACPC).
