BUTUAN CITY – Wala na gikakurat pa ni Butuan City ug Agusan del Norte 1st District Representative Lawrence Lemuel Fortun ang pagpirma na sa hingpit ni Pangulong ROdrigo Duterte sa Anti-Terrorism Bill rason sa pagkahimo na niiing balaud.
Sa eksklusibong pakighinabi sa Bombo Radyo Butuan, gipadayag ni Congressman Fortun nga iya na kining gila-umang daan ilabina nga gisertipikahan kini sa pangulo isip urgent rason nga paspas kining napapasar sa Kamara ug sa Senado.
Giklaro sa kongresista nga bisan og mibotar siya og ‘NO’ niini, apan wala magpasabot nga supak siya sa kinatibuk-ang unod sa maong balaud kondili sa pipila lang ka mga probisyon nga sa iyang lantaw, supak sa atong batakang balaud.
Kini subay na usab sa iyang pagpadayag sa iyang mga obserbasyon nga gibase sa pagsunod usab niya sa proseso sa kamara.
Paglabay sa 15 ka mga adlaw diin mao na ang pag-epekto niini, gipadayag ni Congressman Fortun nga andam siyang musunod sa Anti-Terrorism Act of 2020.
Panawagan lamang niya sa mga otoridad nga mag-amping sa pagpatuman niini aron dili ma-abusuhan ang mga probisyon niini nga balaud ilabina ang mg katungod sa katawhan.
