BUTUAN CITY – Gipahayag sa Cybercrime Investigation and Coordinating Center nga dili makalikay o makaikyas ang mga nagpasiugda sa pagpakaylap og fake news online.
Sumala ni Undersecretary Renato Paraiso, ang executive director sa maong ahensya, ang mga “content” nga adunay sayop o bakak nga impormasyon ilang gipapreserbar.
Pasabot niini, bisan pa ug papason o tangtangon sa nag-post o sa mga nagpaluyo sa pagpakaylap sa fake news, dili na gihapon kini mawala kay adunay na kini kopya nga gitipigan sa ahensya.
Gibutyag sa opisyal nga nakigtambayayong usab sila sa lain-laing law enforcement agencies alang sa gitawag nga “data preservation.”
Busa, pahimangno ni Usec. Aboy sa publiko, ilabi na sa mga nalambigit sa sayop nga buhat, nga adunay na silay mga ebidensya nga magamit aron kasuhan sila ug mapanubag sa balaod.
Pahimangno usab ni Undersecretary Renato Paraiso nga dili na dapat hutdon pa ang limitasyon o pasensya sa gobyerno bahin sa pagpakaylap og sayop nga impormasyon online.
Sumala pa niini nga kung ang “fake news” makadugang na sa hulga sa nasudnong seguridad ug makadaot sa pagsalig sa publiko sa gobyerno, dili na kini pasagdan ug seryoso nilang aksyunan.
Sa laing bahin, mipadayag usab og kabalaka si Department of Information and Communications Technology Secretary Henry Rhoel Aguda mahitungod sa kampanya batok sa fake news.
Sumala niini, imbis nga ang buhatan magpokus sa mga programa nga makatabang sa publiko sa paggamit sa teknolohiya, nabalhin kini ug napadulong sa pag-atubang ug pagsubay sa mga kaso sa sayop nga impormasyon online.
