BUTUAN CITY – Nagduso na usab og resolusyon ang One Caraga Shield ngadto sa Inter-Agency Task Force aron ikonsidera ang ilang hangyo nga dili pasakyon sa mga sweeper flights o kaha mercy voyages ang mga locally stranded individuals kon LSIs nga wala pa mupa-ilalom sa rapid anti-body o kaha sa swab tests.
Kini tungod sa padayong pagsaka sa mga kaso sa COVID-19 ning rehiyon nga gikan ang kadaghanan sa mga SLIs.
Sa eksklusibong pakighinabi sa Bombo Radyo Butuan, gipadayag ni Liza Mazo – chairperson sa Caraga Regional Task Force on COVID-19, challenging alang kanila ang pagpangabot sa mga LSIs tungod usab sa uban nga nanguli by land ug wala malakip sa gikomisyong mga biyahe sa mga hingtungdang ahensya sa gobyerno.
Sukwahi kini sa mga Returning Overseas Filipinos kon ROFs nga mipa-ilalom gyod sa swab test rason nga kadto lang nagnegatibo sa COVID-19 ang papa-ulion sa Caraga Region.
Kini matud pa ang hinungdan nga laras nga ipa-ilalom sa rapid tests ang tanang mga LSIs higayong maka-abot sa bisan asang border control ning rehiyon aron masiguro ang estado sa ilang panglawas ug ma-antiman ingon man ma-monitor kung magpositibo sila sa coronavirus.
