BUTUAN CITY- Pormal na nga nahuman ni President Ferdinand Marcos Jr. ang iyang upat ka-adlaw nga State Visit sa Japan nga gihulagway niining “highly productive ug constructive,” human makuha ang importanteng kasabutan sa ekonomiya, seguridad, ug diplomasya alang sa Pilipinas.
Sumala sa Presidente, mas gipalig-on pa sa pagbisita ang 70-ka tuig nga relasyon sa Pilipinas ug Japan.
Lakip sa mga highlight sa biyahe ang pakigmeeting ni Marcos nila Emperor Naruhito ug Empress Masako, ingon man kang Japanese Prime Minister Sanae Takaichi.
Nagkasabot usab ang duha ka nasud nga tas-an ang ilang relasyon padulong sa Comprehensive Strategic Partnership.
Gipalapad usab sa Pilipinas ug Japan ang kooperasyon sa depensa, enerhiya, artificial intelligence, pamatigyaon, ug maritime security.
Gi-anunsyo usab ang negosasyon alang sa General Security of Military Information Agreement o GSOMIA.
Samtang, ming-abot sa US$3.4 bilyon ang investment pledges ug business opportunities nga nakuha sa Presidente gikan sa mga Japanese investors.
Gilaoman usab nga makahimo kini og kapin 10,000 ka trabaho alang sa mga Pilipino.
Nakigkita usab si Marcos sa Filipino community sa Japan ug gisiguro nga mahimonf prayoridad sa panggamhanan ang ka-ayuhan sa mga overseas Filipino.
