BUTUAN CITY – Nadugangan na usab og 71 ka mga bag-ong kaso ang COVID-19 ning rehiyon sa Caraga samtang usa ang namatay.
Sa virtual announcement sa Department of Health-Center for Health and Development kon DOH-CHD Caraga kaganina, nasuta nga sa maong ihap, 39 ka buok kon 55-porsiento niini mga lalaki samtang 32 ka buok kon 45-porsiento ang mga babaye ug 56-porsiento sa bag-ong mga kaso ang anaa sa edad nga 21 hangtud 50-anyos.
Walo sa maong mga kaso naggikan sa Agusan del Norte nga nabahin sa mga lungsod sa Buenavista, RTR ug Magallanes nga duna’y tagduha samtang tag-usa usab sa mga lungsod sa Nasipit ug Tubay. Nakatala usab og duha ka mga kaso sa Agusan del Sur nga gilangkuban sa tag-usa ka kaso sa San Francisco ug Veruela; 8 sa Surigao City; 12 ka mga kaso sa Surigao del Sur nga na-apod sa mga lungsod sa Carrascal-10 samtang tag-usa usab sa Hinatuan ug Barobo.
Usa ka kaso sa Tandag City samtang unom sa Bislig City nga natala sa Brgy. Mangagoy 3, Tabon-2 ug Poblacion-1.
Pinakadaghan ang natala sa Butuan CIty nga mi-abot sa 28 ug na-apod sa Brgy. Villa Kananga-5, tagtulo sa Brgy. Doongan ug Maon samtang tagduha usab sa Brgy. Ampayon, Limaha, Pigdaulan ug San Ignacio samtang tag-usa usab sa Brgy. Ambago, Banza, De Oro, Baobaoan, Diego Silang, Golden Ribbon, Libertad, Los Angeles ug Pinamanculan.
Sa 71 ka mga bag-ong kaso, 70 kanila ang naka-quarantine na, hugot nga gi-monitor ug gi-atiman samtang usa ang patay pinaagi sa usa ka lalaking taga-Butuan City kinsa duna’y chronic kidney disease ug na-admit niadtong Septembre 22 tungod sa lisod nga pagginhawa apan tungod sa mga komplikasyon, namatay kini pagka-Septembre 28.
