BUTUAN CITY – Nangabot na sa Agusan Del Sur ang kapin 10,000 ka mga delegadong mu-apil sa Caraga Athletic Regional Games 2024 gikan sa nagkada-iyang schools divisions sa Caraga Region.
Sugdan ang maong regional athletic games ugma Mayo 5 hangtud 11 nga himoon sa lungsod sa Prosperidad, Agusan del Sur kondiin 12 ka schools divisions ang mubitbit sa 2,616 ka mga atleta sa elementarya samtang 4,560 usab sa sekondarya wala pa’y labot sa 660 nga musalmot sa special games ingon man 1,660 ka mga national ug regional education ug tournament officials.
Gipangandaman usab ang 14-mil ngadto sa 15-mil nga motambong nga mga bisita, sama sa pamilya, supporters ug uban pang gustong makita ang dula sa ilang mga atleta.
Lakip sa gihimong pagpangandam ang earthquake drill, fire safety orientation, misting ug disinfection operations sa mga billeting quarters nga puy-an sa mga atleta ug pagsiguro nga dunay kaplastaran ang mga musaksi sa pinakadakong sporting event sa Caraga Region.
