BUTUAN CITY – Wala nay aktibong kaso sa Coronavirus disease 2019 (COVID-19) ang Cabadbaran City.
Kini ang gikumpirma ni Roselyn Exaure, information officer sa Cabadbaran City government sa pakighinabi sa Bombo Radyo Butuan human nakarekober na ang pito ka mga aktibong kaso human ang maayong pag-atiman ug pagkwarantina kanila.
Sigon ni Exaure, as of August 12 kagahapong adlawa, COVID-free na ang maong dakbayan butang nga gikalipay usab sa kadumalahan sa syudad ilabina sa katawhan.
Sigon pa ni Exaure, ang hugot nga pagpatuman sa ilang mga health measures ug koordinasyon ingon man monitoring sa mga hingtungdan labi na sa mga mangabot nga Locally Stranded Individuals (LSIs) ug Returning Overseas Filipino (ROFs), ang rason nga nagpabilin lamang sa pito ang natalang kaso sa sakit sa Cabadbaran City kansa hingpit ng nakarekober karon.
Gipasigarbo usab sa tigpamaba nga komportable ang mga indibidwal nga naka-kwarantina sa ilang mga quarantine facilities ilabina kay libre ang tanang pagkaon gikan sa pamahaw hangtod na sa panihapon ug adunay pay snack ug libre usab ang WIFI connection aron duna gihapo’y komunikasyon ang mga gi-kwarantina sa ilang pamilya.
Nanghinaot na lang kini nga mapabilin ang kasamtangang estado sa ilang dakbayan ug hingpit nang mapukan ang COVID-19.
