BUTUAN CITY – Gikumpirma ni Butuan City Councilor Cherry Mae Busa, chairman sa Committee on Health sa Sangguniang Panlungsod nga duna na’y usa ka kumpirmadong kaso sa Japanese encephalitis.
Sa eksklusibong pakighinabi sa Bombo Radyo Butuan, gibutyag ni Konsehal Busa nga kini nga kaso anaa sa Brgy. Bading kansa nakumpirma human usab ang gihimong sunod-sunod nga mga laboratory tests.
Kini usab ang pinaka-unang natala dinhi sa siyudad sukad masukad kansa angayang bantayan tungod kay delikado kini ilabina nga utok ang atakihon sa maong sakit.
Dugang sa konsehal, makuha kini sa lamok nga infected sa maong sakit ug mipa-ak sa tawo sama sa mga lamok nga nagdala sa dengue fever tungod kay infected sa aedes aegypti.
Apil matud pa sa simtomas niini ang problema sa paglitok, dili makalakaw, ug uban pang mga neuro problems.
