BUTUAN CITY- Opisyal nang gisugdan sa City Government of Butuan ang pagtukod sa Butuan City Animal Pound Center, usa ka moderno ug komprehensibong pasilidad nga gilauman mahimong sentro sa veterinary services ug animal welfare sa siyudad.
Sumala ni Mayor Law Fortun, ang proyekto dili lamang mahimong animal pound kondili usa ka landscaped, park-like veterinary center nga adunay animal shelter, breeding facilities, ug pinalapad nga serbisyo sa beterinaryo aron mapalambo ang maayong pag-atiman sa mga hayop, mapalig-on ang kampanya batok sa rabies, ug mapasiugda ang responsableng pagpanag-iya sa mga binuhi.
Ang proyekto, nga gipatuman pinaagi sa panagtambayayong sa City Government of Butuan ug sa Department of Agriculture (DA), gilauman usab nga makapalig-on sa operasyon sa City Veterinary Office, makapauswag sa pagdumala sa mga lagalag ug gibiyaan nga mga hayop, makasuporta sa mga programa sa pet registration, adoption ug redemption, ug makasiguro sa husto nga pagdumala sa veterinary surgical ug infectious wastes isip kabahin sa padayon nga paningkamot sa siyudad sa pagpanalipod sa kahimsog sa publiko ug pagpalambo sa kaayohan sa mga hayop.
