BUTUAN CITY – Hingpit nang gibalik ngadto sa lawod sa ginsakpan sa Municipal Fishery Office sa lungsod sa Buenavista, Agusan del Norte ang napadpad nga butanding kon whale shark kaganinang buntag.
Sa eksklusibong pakighinabi sa Bombo Radyo Butuan, gipadayag ni Elmer Maboloc – administrador sa maong munisipyo, mitimbang ang maong butanding og 300-kilos ug duna’y gitas-ong 16 ka tiil kansa naluya tungod sa kamabaw sa baybay nga iyang napadparan sa may utlanan sa Brgy. Manapa ug Matabao.
Dali matud pang misumbong sa munisipyo ang pipila sa mga residente sa maong dapit nga nakakita niini rason nga girespondihan gilayon kini. Posible matud pang wala na mabantayi sa higanteng isda nga mabaw na ang iyang napadparan dihang nalingaw siya og kaon sa mga gagmay’ng isda ilabina nga ting-isda karon sa maong lungsod.
Nagsugod matud pa pagdaghan og balik sa mga isda maong lungsod human gi-istrikto pagpatuman ni Mayor Pagaspas ang pagbantay sa mga fish sanctuaries.
Pinaagi matud pa niini hugot nga mapugngan ang pagpanguha og mga isdang anaa sulod sa maong mga sangtwaryo gawas lamang niadtong manggawas nga mao na’y mamahimong kuhaon sa mga tawo ug sa mga dagkong isda sama sa nasaag nga butanding.
