BUTUAN CITY- Nagpatuman og bag-ong mga lakang ang Bangko Sentral ng Pilipinas (BSP) aron mahimong mas barato ug mas transparent ang digital nga mga transaksyon pinaagi sa pag-usab sa e-payments framework niini.
Ubos sa Circular No. 1238, dili na mahimong taas kaayo ang bayronon sa person-to-person e-payments tali sa mga bangko, e-wallets, ug uban pang payment service providers kon itandi sa bayad sulod sa parehas nga institusyon.
Sumala ni BSP Governor Eli M. Remolona Jr., makatabang kini aron mas daghang Pilipino ug mga negosyante ang mogamit sa digital payments. Ang lakang gihimo human sa Consumer Expectations Survey sa ika-upat nga kwarter sa 2025 kansa nagpakita nga usa sa matag tulo ka konsumidor ang nagtan-aw sa taas nga bayronon isip dakong babag sa paggamit sa digital payments.
Lakip usab sa mga kausaban ang pagpalapad sa mga lugar diin mahimong gamiton ang digital payments ug pagtugot sa gagmayng negosyo sama sa mga sari-sari store nga makabukas og account gamit ang National ID o ubang opisyal nga dokumento aron mas sayon silang makadawat og digital payments ug makaangkon og dugang nga serbisyong pinansyal.
