BUTUAN CITY – Wala pa’y kabag-uhan sa biyahe sa mga eroplanong mubiya ug mu-abot sa Bancasi Airport alang karong Semana Santa gawas lamang sa madugang nga usa ka Airbus 320 sa Cebu Pacific sugod karong Abril 1, adlaw’ng Huwebes.
Sa eksklusibong pakighinabi sa Bombo Radyo Butuan, gipadayag ni airport manager Evangeline Daba nga maka-accommodate ang maong eroplano og 180 ka mga pasahero nga duna’y biyaheng Butuan-Manila ug vice versa ug mubiyahe matag-adlaw nga Martes, Huwebes ug Dominggo.
Giklaro usab ni Daba nga sa pagkakaron, wala na’y gi-require ang mga airline companies gikan sa mga pasaherong musakay sa ilang mga eroplano gawas lamang niadtong mu-adto sa Cebu City ug Lapu-Lapu City diin mangayo ang mg tugpahanan sa maong mga siyudad og negative result sa RT-PCR test gikan sa mangabot nga mga pasahero.
Samtang ang manulod usab dinhi sa Caraga region agi sa maong tugpahanan, wala na gi-require pagdala og mga dokumento.
Bugtong nilang gi-require mao ang mga frontliners nga magsuot kanunay og personal protective equipment kon PPE sa pag-handle nila sa mga flights.
Naay usab sila’y 3D app nga maoy mag-monitor sa mga tawong mangabot sa maong tugpahanan.
Aminado usab ang opisyal nga apektado na ang ilang koleksyon tungod sa hulgang hatud sa COVCID-19 pandemic.
Ang ilang gihimo, nag-meeting na sila kagahapon aron pangkolektahon na ang mga utang tungod kay gikan sa pito ka mga flights kada-adlaw niadtong wala pa ang pandemya, karon mu-abot na lang sila sa duha kada-adlaw rason nga dakong kita ang nakibhang kanila.
