BUTUAN CITY- Gipalig-on sa mga kapulisan sa Butuan City ubos sa liderato ni PCol. Richie Yatar, City Director sa Butuan City Police Office, ang ilang intensified beat patrolling sa mga pampubliko ug pribadong eskwelahan sa siyudad isip kabahin sa mas hugot nga seguridad aron mapanalipdan ang mga estudyante, magtutudlo, ug mga kawani sa eskwelahan, ilabina human sa bag-ohay nga school shooting incident nga nahitabo sa Tacloban City.
Sumala sa kapulisan, gipadaghan ang deployment sa mga police personnel sa mga eskwelahan ug mga lugar nga kasagarang ginatapukan sa mga estudyante aron masiguro ang kalinaw ug kahapsay sa komunidad sa edukasyon.
Gipatuman usab ang regular nga paglibot, random inspection, ug pakigkoordinar sa mga school administrators ug barangay officials aron mahibal-an dayon ug matubag ang posibleng mga hulga sa seguridad. Sigon pa sa mga awtoridad, ang maong lakang dili tungod kay adunay direktang hulga sa Butuan City kondili usa ka preventive measure aron malikayan ang bisan unsang insidente nga mahimong makadaot sa kaluwasan sa mga kabatan-onan.
Gidasig usab sa kapulisan ang publiko, ilabina ang mga ginikanan ug mga opisyal sa eskwelahan, nga magpabiling alerto ug dayong motaho sa mga gidudahang kalihokan aron mapadayon ang luwas ug malinawon nga palibot sa pagtuon alang sa tanang estudyante sa siyudad.
