BUTUAN CITY- Gipasiugda ni Agusan del Norte Representative Congressman Dale Corvera nga ang Brigada Eskwela dili lamang usa ka tinuig nga kalihokan kondili usa ka tinuod nga pagpakita sa espiritu sa bayanihan sa mga Pilipino.
Sa iyang pakigpulong atol sa National kickoff sa Brigada Eskwela nga gihimo sa Cabadbaran City National High School, sigon niini nga ang matag tabang ug kontribusyon, bisan gamay paman gamay, adunay dakong papel sa paghimo og luwas, angay, ug andam nga palibot sa pagkat-on alang sa mga estudyante sa pagsugod sa bag-ong klase.
Gi-awhag usab ni Corvera ang padayon nga partisipasyon sa komunidad, samtang iyang gipasabot nga pinaagi sa hiniusang paningkamot, masiguro ang dekalidad nga edukasyon alang sa matag magtutungha.
Samtang giawhag usab ni Agusan del Norte Governor Maria Angelica Rosedell Amante ang komunidad ug tanang stakeholders nga ipadayon ang espiritu sa bayanihan samtang iyang gipasiugda ang kamahinungdanon sa hiniusang paningkamot sa pagsulbad sa mga hagit nga giatubang sa sektor sa edukasyon.
Sa iyang pakigpulong atol gihimong 2026 Brigada Eskwela national kickoff, gibutyag sa gobernadora nga walay hagit nga dili mabuntog kon magtinabangay ug magsinabtanay ang mga katawhan. Giawhag usab niini ang mga ahensya sa gobyerno, pribadong sektor, magtutudlo, ginikanan ug mga boluntaryo nga magpabiling nagkahiusa aron masiguro ang luwas ug maayong palibot sa pagkat-on alang sa mga estudyante, samtang iyang usab gipasiugda nga pinaagi sa panaghiusa ug pag-ambit sa responsibilidad, mas mapalambo pa ang kaayohan ug kaugmaon sa kabatan-onan.
