BUTUAN CITY – Pipila ka ma pamilya sa Purok 1-C sa Brgy. Ampayon ning siyudad sa Butuan ang nanghikling na ngadto sa designated evacuation center human nga mi-abot na sa taga-hawak ang tubig-baha nga mugna sa pila ka oras na nga pagbundak sa ulan.
Sa interview sa Bombo Radyo Butuan, gipadayag sa usa sa mga residente nga si Charito Reso nga sukad duna’y housing project sa ilang lugar, dali na silang mabahaan bisan og pila ka oras pa lang ang ulan tungod kay wala na matud pa’y kaagi-an ang tubig padulong sa sapa ug sa main line sa irrigation canal sa National Irrigation Administration kon NIA.
Basta ingon niini matud pa nga panahon, wala na sila’y laing buhaton kondili ang pag-andam kanunay sa ilang mga angayang buhaton aron wala na’y probema higayong sila pabakwiton na.
Tungod sa balik-balik nga problema panahon sa pagbundak sa ulan, nanawagan si Reso sa tanang hingtungdang mga opisyal ug government agencies ning siyudad nga unta lantawon ang ilang kahimtang ug pangitaan og solusyon aron dili mabutang sa alanganin ang ilang kinabuhi ug mga kabtangan.
Bisan og matunulan matud pa sila og hinabang kada-bakwit apan mas maayong ang pagpangita og paagi nga duna’y ka-awasan ang tubig-baha nga mulunop sa ilang lugar ang himuon matud pa sa city government.
