BUTUAN CITY- Nahimo nang Tropical Depression ang Low Pressure Area kon LPA sa sidlakan sa Infanta, Quezon ug ginganlan kini og Luis, sumala sa Philippine Atmospheric, Geophysical and Astronomical Services Administration kon PAGASA.
Kagahapon sa may alas-10:00 sa gabii, namatikdan ang sentro niini sa 360 ka kilometro sa sidlakan sa Daet, Camarines Norte, nga adunay kusog sa hangin nga moabot sa 45 km/h ug pagbugso hangtod sa 55 km/h samtang naglihok paingon sa kasadpan sa 15 km/h.
Gipahamtang ang Tropical Cyclone Wind Signal kon TCWS No. 1 sa Polillo Islands, amihanang bahin sa Camarines Norte ug amihanang Catanduanes tungod sa hulga sa kusog nga hangin.
Gilauman usab nga ang Tropical Depression Luis ug Habagat magdala og kusog hangtod gale-force nga paghuros sa hangin sa pipila ka bahin sa Luzon, Visayas ug Mindanao, samtang padayon nga gipasidan-an ang publiko sa posibilidad sa kusog nga ulan, balod sa kadagatan ug uban pang peligro.
Gihangyo usab sa PAGASA ang tanang residente ug mga lokal nga opisyal nga magmatngon ug mosunod sa mga pahimangno aron mapanalipdan ang kinabuhi ug mga kabtangan.
