BUTUAN CITY – Gikumpirma sa Department of Health – Center for Health Development- Caraga ang nadugang nga laing 23 ka mga bag-ong kaso na usab sa COVID-19 hinungdan nga misaka pa sa 161 ang kinatibuk-ang kumpirmadong kaso ning rehiyon.
Kini human nila nadawat ang 219 ka mga RT-PCR results gikan Southern Philippines Medical Center (SPMC) ug Davao Regional Medical Center sub- national laboratories kondiin sa maong ihap, 169 ang nagnegtibo samtang 50 ang nagpositibo sa maong virus.
Sa online briefing kagabie, gikumpirma ni Dr. Rodulfo Antonio Albornoz – assistant regional director sa DOH-Caraga nga gilangkuban ang mga negative RT-PCR results sa 11 ka mga follow-up tests sa una nang confirmed cases, 11 ka suspect cases , 4 ka probable cases, ug ang resulta gikan sa mga high-risk individuals kinsa unang nagpostibo sa Rapid antibody-based test ug mga dunay travel history ug exposure sa mga lugar nga duna’y COVID-19.
Apil usab sa 50 nga nagpositibo sa COVID-19 ang 27 ka mga follow-up tests sa una nang confirmed cases ug 23 ka mga bag-ong kaso.
Sumala ni Dr. Albornoz, ang mga bag-ong nagpositibo sa COVID-19 gilangkuban sa mga taga-Agusan del Norte nga nakatala og 5 ka kaso kondiin tag-usa niini sa lungsod sa Buenavista, Carmen ug Nasipit ug duha sa Remedios T. Romualdez kon RTR.
Upat ang natala sa Agusan del Sur diin tulo niini gikan sa lungsod sa Rosario ug usa sa Veruela.
Ang Surigao del Norte usab duna’y 8 ka kasong nadugang kondiin 3 niini sa Placer, 2 sa Manit ug tag-usa sa Bacuag, Sison ug Tubod.
Nakatala usab og 2 ka kaso ang Surgao del Sur kondiin tag-usa ang natala sa mg lungsod sa Cantilan ug San Miguel.
Nadugangan usab og tag-usa ka kaso ang mga siyudad sa Bayugan sa Agusan del Sur ug Bislig City sa Surigao del Sur samtang duha ka bag-ong kaso dinhi sa siyudad sa Butuan.
Sigon ni Dr. . Albornoz, apil sa mga kaso ang 15 ka Locally Stranded Individuals (LSI) ug 8 ka mga Returning Overseas Filipinos (ROFs) nga pulos asymptomatic kon walay gibating simtomas ug naka-strict quarantine na sa isolation facility sa ilang tagsa-tagsa ka mga LGUs.
