BUTUAN CITY – Gikustudiya na sa kapulisan ang usa ka commanding officer sa rebeldeng New People’s Army kon NPA ilalom sa Platoon 1, Sagrado de Grabidad, Southern Regional Command human kini gi-aresto sa hospital sa Tagum City, Davao del Norte kagahapong adlawa.
Sigon ni Police Regional Office (PRO) 13 director Brigadier General Joselito Esquivel, Jr. nadakpan si Joel Delahilba, alyas ‘Kid/Viray/Noel Dadang’, 32-anyos, residente sa Brgy. Unaban, Tago, Surigao del Sur samtang kini nagpatambal sa Davao Regional Medical Center.
Gi-serve ang warrant of arrest pasado ala-1:30 sa hapon sa mga operatiba sa PRO-13, 9th Special Forces Company sa Philippine Army, og Tagum City Police Station.
Gi-isyu ang maong warrant of arrest ni Judge Lilibeth Ladaga, presiding judge sa Regional Trial Court Branch 28, 11th Judicial Region sa kasong frustrated murder nga dunay girekomendang pyansang mu-abot sa 200-mil pesos og attempted murder nga dunay piyansang nagkantidad og 120-mil pesos.
Ang nasangpit nga suspetsado mao ang usa sa pasyenteng gibiyahe sa International Committee of the Red Cross gikan sa Surigao del Sur ngadto sa Tagum City tungod sa samad pinusilan sa iyang walang bahin sa gusok.
Sumala pa ni General Esquivel, segurohon nila ang kaluwasan ug seguridad sa dinakpan nga gibiyaan lang sa iyang mga ka-ubanan sa encounter site.
Gipahimangnoan sa opisyal ang nagpabiling aktibong miyembro sa NPA nga walay panag-igsoonay sa armadong pakigbisog dayung pasabot nga motabang ang gobyerno ngadto ni bisan kinsang mutahan og balik sa balaod.
