BUTUAN CITY- Isip kabahin sa pagsaulog sa Pride Month, gipaambit ni Angie Mead King sa social media ang iyang before-and-after transition photos isip simbolo sa iyang personal nga panaw ug pagdawat sa tinuod niyang kaugalingon.
Gipadayag sa race car driver nga kaniadto nahadlok siya nga biyaan sa mga tawo nga iyang gihigugma tungod sa iyang gender transition, apan gibutyag niini ang iyang lig-on nga relasyon uban sa iyang kapikas nga si Joey Mead maoy pamatuod nga posible ang gugma ug pagsinabtanay bisan human sa maong pagbag-o.
Gipasalamatan usab ni Angie ang tanang mipadayon sa pagsuporta kaniya ug giaghat ang mga nag-atubang og gender o body dysmorphia nga mangayo og tabang sa mga propesyonal aron matabangan sila sa ilang kaugalingong panaw. Si Angie mipadayag nga transgender niadtong 2016, ug karong tuiga iyang gisaulog ang usa ka dekada sa iyang gitawag nga “rebirth” uban sa mensahe sa paglaum ug pagdasig sa uban.
