BUTUAN CITY – Nagbilin og mubo lang nga mensahe si Atty. Zuleika Lopez, chief of staff ni Bise Presidente Sara Duterte, sa wala pa siya mibiya gikan sa Senado kagahapon human nakigtagbo kang Senate Secretary Renato Bantug Jr human pormal nga nagpagawas ang Impeachment Court og subpoena ad testificandum batok kaniya aron motubag ug motestigo karong Hulyo 13 ug 14 aron maghatag og testimonya kabahin sa mga isyu nga nalakip sa sa impeachment case batuk kang VP Sara.
Ang subpoena, nga gipirmahan ni Senate Presiding Officer Senator Francis “Chiz” Escudero ug nadawat na sa Central Records Unit sa OVP.
Nasayrang wala na siya motubag sa uban pang pangutana sa media apan nagbilin usab kini og mubo nga mensahe nga “Andam sa Bagyong Inday.”
Bisan nga adunay bagyong Inday nga gitutukan sulod sa Philippine Area of Responsibility, nasayrang Inday usab ang tawag sa Bise Presidente.
Samtang, gipasabot ni Senate Secretary Renato Bantug Jr. nga ang pagbisita ni Lopez sa Senado alang lamang sa mga administratibong isyu nga may kalabotan sa umaabot nga impeachment trial.
Nangutana matud pa si Lopez kung pila ka bisita sa defense panel ang tugotan nga mosulod sa session hall ug kung pwede ba nga magdala og kaugalingong media team ang Office of the Vice President (OVP).
Giklaro ni Bantug nga dili tugotan ang kaugalingong media coverage sa duha ka panig ug igo na ang gihatag nga media access sa Senado.
