BUTUAN CITY – Miabot na si Alex Eala sa United States alang sa duha ka dagkong torneyo nga posibleng makapasaka kaniya sa Top 30 sa kalibutan sa unang higayon.
Ang sayo nga pag-abot sa 20-anyos nga Filipina aron mas mapangandaman og maayo ang Indian Wells Open nga magsugod sa Marso 4 hangtud sa 15 ug sa Miami Open gikan sa Marso 17 hangtud 29, nga parehong WTA1000 tournaments.
Nasayrang gikan si Eala sa usa ka malampusong kampanya sa Sidlakan, diin nakaabot siya sa Last 8 sa Dubai Duty Free Tennis Championship sa miaging semana.
Nagpakitang-gilas usab siya sa ASB Classic sa Auckland miabot sa semifinals, sa Philippine Women’s Open sa quarterfinals, ug sa Abu Dhabi Open, diin nakaabot siya sa singles quarterfinals ug doubles semifinals uban sa iyang Indonesian partner nga si Janice Tjen. Ang iyang usa ka sayong kapakyasan mao ang Round 1 sa Qatar Open.
Nakuha usab niya ang exhibition title sa Kooyong Classic ug nakadebut sa main draw sa Australian Open sa Melbourne.
Tungod sa iyang lig-on nga performance, misaka siya sa No. 31 sa WTA rankings nga may 1,432 puntos gikan sa No. 47 sa miaging semana—usa sa pinakadako nga pagsaka sa ranggo nga nagbutang kaniya sa mas duol sa mga bantugang magdudula sa tennis ilabina kung magpadayon pa ang iyang maayong duwa sa California ug Miami.
Sa dili pa siya mobalik sa aksyon, si Alex Eala miagi una sa Nike World Headquarters sa Oregon, diin mainiton siyang gidawat ug giandaman og espesyal nga mga regalo apil na ang iyang kaugalingong mga hulagway.
