BUTUAN CITY – Makabaton na og higayon ang mga Pilipinong fans nga personal nga makita si Alex Eala human sa iyang makasaysayaNOng kampanya sa Wimbledon tungod sa himuon ang Alex Eala Fan Meet Experience sa Activity Center sa Makati City karong Miyerkules, Hulyo 15.
Magsugod ang registration alas-4:00 sa hapon ug ang programa sugdan sa alas-6:00 sa gabii.
Madumdumang mihimo og kasaysayan si Eala dihang iyang napildi ang defending champion nga si Iga Swiatek sa Wimbledon 2026 sa wala pa siya napildi sa Italian nga si Jasmine Paolini sa Round of 16.
Sa iyang pag-abot sa fourth round, nakakuha si Eala og 240 WTA ranking points ug nakadawat og US$396,100 nga premyo nga bugti sa kapin 24-milyunes pisos.
Sa wala pa ang Wimbledon, nakatala na siya og US$871,438 nga prize money karon nga 2026 season o bugti sa P53,616,477. Gawas pa niini, malampuson usab ang iyang grass-court season human makadaog sa WTA 125 title sa Birmingham ug naka-abot sa semifinals sa Berlin Tennis Open.
Ang iyang pagbalik sa nasud gilauman nga mahimong inspirasyon sa mga batan-ong tennis players ug maghatag og higayon sa mga fans nga ipakita ang ilang suporta sa pambato sa Pilipinas sa internasyonal nga entablado.
