BUTUAN CITY – Mitaliwan na ang abogadong si Jose Sison, nga naila isip host sa 1990s legal drama anthology nga “Ipaglaban Mo,” sa edad nga 88-anyos.
Gikumpirma ang kamatayon niini sa iyang anak nga si Atty. Joseph Peter “Jopet” Sison, pinaagi sa social media post kagahapong adlawa, Hulyo 23.
Sumala pa sa anak nga malinawong mitaliwan ang iyang amahan kagahapon sa buntag diin gihupay sila sa pagtoong napuy-an niini ang mabulukong kinabuhi isip abogado, bana, amahan sa unom ka mga anak og apohan sa 16 ka mga apo.
Gipa-ambit usab niini ang mga detalye sa haya ug paglubong sa iyang amahan.
Ang haya himoon sa Ascension Chapel, The Immaculate Conception Cathedral of Cubao sugod sa Biyernes sa hapon, Hulyo 24.
Ang paglubong didto sa Heavens Gate 1 Memorial Park, Antipolo City sa Martes, Hulyo 28.
Nailhan og maayo si Jose Sison sa lokal nga telebisyon sa dihang nag-host siya sa sikat nga legal drama anthology nga “Kung May Katwiran, Ipaglaban Mo” gikan sa 1988 hangtod 2000 ug gikan sa 2014 hangtod 2020.
Ang iyang anak nga si Jopet niuban kaniya sa maong show ug sa kadugayan nahimo kining host gikan sa 2014 hangtod 2020.
