BUTUAN CITY- Giatake na usab sa pwersa sa Ukraine sa ikatulong higayon sulod lamang sa usa ka semana ang Crimean Bridge, sumala sa usa ka opisyal sa Russia, hinungdan nga temporaryong gisuspenso ang trapiko sa maong tulay.
Gipamatud-an kini ni Moscow-installed Crimea Governor Sergei Aksyonov, diin ang maong tulay maoy nagkonektar sa Taman Peninsula sa Russia ug sa Crimea nga giokupar sa mga pwersa sa Russia niadtong 2014.
Sigon pa sa Russia, duha na ka pag-atake ang unang natala sa maong estruktura sa miaging mga adlaw, diin adunay bahin niini nga nangahugno ngadto sa Kerch Strait.
Samtang, nagpadayon ang pagpahimangno sa Ukraine batok sa posibleng pag-atake sa kahanginan sa pipila ka mga distrito duol sa kaulohan nga Kyiv, human upat ka tawo ang namatay sa pag-atake sa mga drone sa Russia sa siyudad sa Odessa niadtong Miyerkules, sumala ni Governor Oleh Kiper.
Gawas niini, gitarget usab sa Russia ang usa ka tulay ibabaw sa Dnipro River sa Kyiv, kansa hinungdan sa paglangan sa trapiko ug pagkabalda sa suplay sa kuryente ug tubig sa maong rehiyon.












