-- ADVERTISEMENT --

BUTUAN CITY- Girescue ni Minnesota Timberwolves forward Jaden McDaniels ang grupo niini aron nga makalikay sa kapildihan batok sa Portland Trail Blazers, human niini gipasulod ang game-winning layup nga adunay 2.5 segundos na lang sa nahibiling oras sa duwa, alang sa nipis nga 106-105 nga kadaogan.

Hugot ang panag-indigay sa duha ka koponan diin una nang nakalabaw ang Minnesota sa unang quarter, 29-17, apan mibawi ang Portland sa ikaduhang quarter pinaagi sa 31 puntos aron mapagamay ang labaw sa Wolves ngadto sa 49-48, samtang natabla na ang duwa sa pagtapos sa third quarter, 79-79.

Sa katapusang bahin sa duwa, nag-ilis-ilis pa sa labaw ang duha ka koponan hangtod nakuha sa Portland ang 105-104 nga bentaha, napulo na lang ka segundo sa nahibiling oras, apan nakapuntos si McDaniels alang sa game-winning basket.

Nanguna sa puntos alang sa Minnesota si Ayo Dosunmu nga adunay 30 puntos lakip ang pito ka three-pointers, samtang mitampo si McDaniels og 22 puntos, lima ka rebounds, upat ka assists, tulo ka steals ug usa ka block.

Sa bahin sa Portland, wala makaluwas sa koponan ang 25 puntos ni Damian Lillard ug 23 puntos ni Jrue Holiday, hinungdan nga ilang nasinati ang ikalimang kapildihan karong season, samtang ang Minnesota Timberwolves mipalambo sa ilang baroganan ngadto sa 11-4 win-loss record.

-- ADVERTISEMENT --