BUTUAN CITY – Gi-awhag ni National Bureau of Investigation (NBI) Director Melvin Matibag ang kampo ni Vice President Sara Duterte nga musang-at og pormal nga reklamo kalabot sa gika-ingong pagpanghulga ug pagpugos sa pagpirma sa usa ka kanhi household staff sa Bise Presidente.
Kini human gipadayag ni Atty. Paolo Panelo, tigpamaba ni Duterte, nga nakadawat matud pa ang Bise Presidente og mensahe gikan sa kanhing empleyado nga nangayo og tabang ug pagluwas kaniya sa Manila. Sumala ni Panelo, nadawat ang maong mensahe pasado alas-11:19 ning mi-aging gabii.
Nakalatid niini nga anaa sa kustodiya o kontrol sa pipila ka indibidwal ang kanhi staff, gihulga ang kinabuhi ug gipugos sa pagpirma sa usa ka dokumento nga iyang gibalibaran.
Samtang, gipadayag ni Matibag nga kinahanglan direktang moduol sa mga otoridad ang kampo ni Duterte kung tinuod nga adunay hulga ug gusto nilang ipasusi ang maong insidente.
Giklaro sa NBI chief nga hangtod wala pay klarong mga dokumento ug ebidensiya nga mopamatuod sa maong mga alegasyon, makonsidera lamang kining tsismis.
Dugang pa sa opisyal nga wala pa makadawat og pormal nga reklamo ang ilang buhatan kalabot niini.












