BUTUAN CITY – Mi-abot na sa 460-litros nga sagol sa lana ug tubig gawas pa sa 170-litro nga oily waste ug 390-kilos nga kontaminadong basura ang natigom sa mga personahe sa Philippine Coast Guard atol sa containment operation nga ilang gihimo sa oil spill nga mugna sa pagtakilid sa Landing Craft Tank (LCT) 8 sa kadagatan sa lungsod sa Carrascal, Surigao del Sur.
Nasayrang gikan sa dunggu-anan sa Carrascal Nickel Corporation ang maong cargo ship ug tungod sa kusog nga hangin ug balod sa dagat, mitakilid kini ug nasangad sa kadagatan sa Barangay Bon-ot, lungsod sa Carrascal.
Gibana-bana nga mokabat sa 800-litros sa krudo ang mi-awas gikan sa barko ug mikanat sa kapin 200 metros nga bahin sa kadagatan.
Human sa insidente gilusad gilayon ang operasyon aron makontrolar ang oil spill ug malikayan ang dugang nga pagkaylap niini gamit ang oil spill containment booms ug absorbent pads.
Nakigtambayayong ang mga otoridad sa Carrascal Municipal Disaster Risk Reduction and Management Office alang sa pagresponde sa maong insidente.
Samtang luwas na gikan sa peligro ang tanang 16 ka tripulante nga sakay sa barko lakip na ang kapitan.
