BUTUAN CITY- Mingsaka na 7.8 porsiyento ang inflation rate sa nasud niadtong buwan sa Oktubre gikan sa 7.2 porsiyento niadtong Setyembre, sumala sa taho sa Philippine Statistics Authority (PSA).
Kini ang ika-duhang sunod-sunod nga buwan nga nakatala og paspas nga pagsaka sa lebel sa presyo sa mga palaliton sa nasud.
Tungod sa bag-ong pagsaka niini, ming-abot na sa 5.6 porsiyento ang average inflation gikan Enero hangtud Oktubre, kansa klaro nga minglapas na sa 2 hangtud 4 porsiyentong target sa panggamhanan.
Gipadayag ni PSA Chief ug National Statistician Claire Dennis Mapa nga ang sektor sa transportasyon ang nag-unang nagtuklod sa pagsaka human kini makatala og 20.1 porsiyentong inflation rate ug ming-amot og 62.9 porsiyento sa kinatibuk-ang pagsaka.
Lakip sa natumbok niini nga hinungdan mao ang mas taas nga pamasahe sa mga jeepney ug bus, ingon man ang pagsaka sa presyo sa gasolina, Liquefied Petroleum Gas (LPG), ug sukot sa kuryente.
Bisan paman, natala sa ahensya ang mas hinay nga pagsaka sa presyo sa pagkaon sa tibuok nasud sa susamang panahon.
