BUTUAN CITY- Gi-insistar ni House impeachment prosecution spokesman former Representative Ace Barbers nga lisod ipanghimakak ang mga dokumento ug financial records nga ipa-atubang sa prosecution batok kang Vice President Sara Duterte sa Senate impeachment court.
Sumala ni Barbers, ang mga records gikan sa Bureau of Internal Revenue o BIR ug mga bangko opisyal nga dokomento kansa kinahanglan nga tubagon sa kampo sa bise presidente.
Base sa taho sa walo ka bangko sa Senado, ming-abot sa 59 million pesos ang hini-usang year-end balances sa mga bank account nila Vice President Duterte ug sa bana niining si Atty. Manases “Mans” Carpio niadtong 2022, ug 71 million pesos niadtong 2023.
Natala usab matud pa ang 22 million pesos niadtong 2024 ug 39 million pesos niadtong
2025.
Samtang, nakalatid sa mga Statement of Assets, Liabilities and Net Worth o SALN ni Duterte gikan 2019 hangtud 2025 nga wala kini gidiklarang cash on hand o cash in bank.
Gitaho usab sa Anti-Money Laundering Council o AMLC ang dili mo-ubos sa 4.4 billion pesos ang covered ug suspicious transactions nga adunay kalabotan sa bise presidente ug sa bana niini.
Bisan paman, sigon ni Barbers gi-respeto nila ang katungod sa depensa nga magpa-atobang og testigo ug kontrahon ang mga ebidensiya.
