BUTUAN CITY- Nasikop sa hiniusang buy-bust operation sa Philippine Drug Enforcement Agency (PDEA) ug kapulisan ang usa ka 38-anyos nga walay trabaho nga lalaki sa Purok 4, Barangay Obrero, Butuan City, diin nakompiska ang gibanabanang 72 gramos nga gituohang shabu kansa nagkantidad og ₱489,600 niadtong Lunes sa gabii, Oktubre 26, 2026.
Ang maong dinakpan, nga ulitawo ug residente sa maong barangay, giila sa mga awtoridad nga priority drug personality sa kampanya batok sa ilegal nga droga.
Gipahigayon ang operasyon sa PDEA RO XIII Agusan del Norte Provincial Office, Seaport Interdiction Unit, Airport Interdiction Unit, Legal and Prosecution Unit, ug Butuan City Police Station 2.
Nasakmit gikan sa suspek ang usa ka pakete nga adunay gibanabanang pito ka gramos nga gituohang shabu nga gigamit sa transaksyon, lima pa ka pakete nga adunay kinatibuk-ang gibug-aton nga mga 65 gramos, ug ang buy-bust money.
Atubangon sa suspek ang mga kasong pagbaligya ug pagpanag-iya og ilegal nga droga ubos sa Sections 5 ug 11, Article II sa Republic Act No. 9165 o Comprehensive Dangerous Drugs Act of 2002, nga giusab pinaagi sa Republic Act No. 10640.
Gidayeg usab ni PDEA RO XIII Director Laurefel Gabales ang koordinadong paningkamot sa mga personnel nga milakip sa operasyon ug gipasiugda ang kamahinungdanon sa kooperasyon sa mga ahensiya sa pagpatuman sa balaod, lokal nga pangagamhanan, mga lider sa komunidad, mga saksi, ug katawhan aron mapugngan ug masumpo ang ilegal nga kalihokan nga may kalabotan sa droga.
