BUTUAN CITY – Gisayo na sa National Irrigation Administration kon NIA-Caraga ang ilang patubig sa mga umahan kaysa orihinal nga eskedyol nga unta karong Nobyembre, subay na usab sa ilang mitigating measures batuk sa El Niño phenomenon aron malikayan ang dautang epekto niini sa mga basakan.
Sa eksklusibong pakighinabi sa Bombo Radyo Butuan, gipadayag ni Atty John Ilao Cabilitasan, sa pagkakaron, duna pa sila’y pundong tubig sa ilang mga irrigation systems tungod sa nasinatiang mga pag-ulan.
Ang pagsayo nila pagpatubig mugna sa ubang mga umahan nga wala pa ka-ani samtang kadtong mga naka-ani na, ilang gipanawagan nga magsugod na usab pagpananom aron pag-abot sa peak sa Ek Niño phenomenon sa unang kwarter sunod tuig, maka-ani na sila.
Aron matud pa masiguro ang saktong patubig sa mga basakan, kada-adlaw silang duna’y monitoring sa dam aron sakto ang pag-awas niini diha sa mga irrigation canals. Gipasabot sa opisyal nga duna’y duha ka irrigation system silang gipatuman alang sa mga dagko ug gagmay’ng basakan kondiin dinhi sa Agusan del Norte, tulo ka area ang duna’y dagkong basakan.
Gilangkuban kini sa basakan sa Cabadbaran City diin duna sila’y concern samtang wala’y concern ang area sa Butuan City ug sa lungsod sa Las Nieves.
Sa pagkakaron, ang concern nila anaa sa gamay lang nga subsidy nga gamiton nila pangbayad sa kuryente niadtong mga irrigation canals nga magkuha og tuburan sa tubig sa Agusan River.
Hinuon, nangayo na matud pa sila og dugang pundo gikan sa ilang sentrong buhatan aron mapunduhan kanunay ang mga irrigation systems nga ubos sa ilang hurisdiksyon.
