BUTUAN CITY – Gi-asdang ni Parañaque 2nd District Representative Brian Yamsuan ang House Bill No. 8617 nga nagtumong nga obligahon ang Philippine Health Insurance Corporation kon PhilHealth sa paghatag og benepisyo alang sa mental health care sa mga inahan nga nakasinati og mga problema sa pangisip human manganak, ilabina ang postpartum depression.
Ubos sa maong sugyot, masakop ang regular nga screening, diagnosis ug pagtambal sa postpartum blues, postpartum depression ug postpartum psychosis.
Sigon ni Yamsuan, dili angay pasagdan ang depresyon, kabalaka ug stress sa mga inahan human manganak tungod kay nanginahanglan usab sila og hustong suporta ug pag-atiman.
Nakaltid usab sa sugyot-balaudnon nga ang Department of Health kon DOH ug ang PhilHealth magpatuman og nasudnong kampanya aron mapalapdan ang kahibalo kabahin sa postpartum mental health ug matudloan ang mga inahan kung asa makapangayo og tabang.
Tumong niini nga maminusan ang babag sa pagpangita og pagtambal, lakip ang stigma ug gasto nga kasagarang sagubangon sa mga inahan ug ilang pamilya.
