BUTUAN CITY – Nagtuo ang Department of Justice (DOJ) nga ana pa gihapon sulod sa Pilipinas ang puganteng negosyante nga si Charlie “Atong” Ang, bisan pa sa naha-unang pamahayag ni Department of the Interior and Local Government (DILG) Secretary Jonvic Remulla kalabot sa matud pa, nakuha nilang intelligence report nga nakagawas na kini sa nasud.
Sigon ni DOJ Secretary Fredderick Vida, wala siya mahibalo kung asa nakuha ni Remulla ang maong intelligence report nga nakabiya na sa Pilipinas si Ang.
Sigon ni Vida, base sa mga rekord sa Bureau of Immigration (BI) ug sa Department of Justice, wala pa’y lig-on ug konkretong impormasyon nga magpamatuod nga nakagawas na sa nasud ang maong negosyante.
Gipasabot sa kalihim nga dili pa niya makumpirma ang pagbiya ni Ang sa Pilipinas tungod kay ang ilang gibasehan mao ang opisyal nga mga rekord sa Immigration.
Giklaro usab ni Vida nga wala kini nagpasabot nga iyang gisupak ang pamahayag ni DILG Secretary Jonvic Remulla, tungod kay nag-agad lamang siya sa impormasyon nga anaa sa mga opisyal nga rekord sa ilang ahensiya.
Si Charlie “Atong” Ang nag-atubang sa mga kasong kidnapping with homicide ug kidnapping with serious illegal detention nga may kalabotan sa pagkawala sa mga sabungero.
Padayon ang pagpangita kaniya sa mga otoridad aron ma-atubang niya ang mga kaso nga gisang-at batok kaniya.
