BUTUAN CITY – Mukabat sa 4.62-gramos sa gidudahang shabu nga gibana-banang nagkantidad og ₱31,416 ang nakumpiska gikan sa mag-amahan sa gilusad nga drug buy-bust operation pasado alas-11:27 kagabii sa Purok 8, Brgy. Limaha ning siyudad sa Butuan.
Nadakpan na sa operating team gikan sa Regional Police Drug Enforcement Unit-13 ang mag-amahang sila alyas Kimpang, 50-anyos ug ang 28-anyos niining anak nga ulitawong si alyas Bayot, parehong residente sa maong dapit.
Apil sa nakumpiska atol sa operasyon ang 500-pisos nga marked money, usa ka selyadong sachet sa suspected shabu nga nagsilbing buy bust item uban sa laing tulo ka sachets sa susamang epektos, nagkada-iyang illegal drug parahernalia, usa ka cell phone ug usa ka kolor blue nga pouch.
Gikostudiya na sa Regional Police Drug Enforcement Unit-13 ang dinakpan ug ang nakumpiskang mga butang alang sa tukmang disposasyon ug dokumentasyon.
