BUTUAN CITY – Naigo sa mga Ukrainian drones ang pinakadakong data center sa Russia nga gipanag-iya sa Sberbank, ang pinakadakong bangko ug usa sa mga dagkong kompanya sa teknolohiya sa maong nasud.
Base sa mga report, nahimutang ang maong pasilidad sa Balakovo, sa Saratov region, sa habagatang-kasadpang bahin sa Russia.
Gipamatud-an sa opisyal sa Sberbank nga gi-atake ang ilang data processing center, apan nagpabiling normal ang operasyon sa ilang mga sistema ug serbisyo human sa insidente.
Nahitabong ang pag-atake human sa tulo ka sunod-sunod nga pag-atake sa Ukrainian drones sa mga data center sa Yandex, usa ka dagkong kompanya sa teknolohiya sa Russia, ning mi-aging semana.
Ang mga pasilidad sa Yandex sa Sasovo, Kaluga ug Vladimir naigo sa mga pag-atake, diin adunay mga pasilidad nga napugos sa pagsuspenso sa operasyon ug miresulta sa pagkabalda sa pipila ka digital services, lakip na ang cloud computing ug uban pang serbisyo nga gigamit sa mga negosyo ug indibidwal.
Ang mga pag-atake kabahin sa nagkagrabeng panagbangi tali sa Russia ug Ukraine nga karon naglakip na sa mga pasilidad sa teknolohiya ug digital infrastructure. Sigon sa Ukraine, tubag kini sa mga pag-atake sa Russia batok sa ilang kaugalingong mga data center ug imprastraktura sa komunikasyon.
Gila-umang magpadayon ang hugot nga pag-monitor sa seguridad sa maong mga pasilidad tungod sa ilang dakong papel sa pagpadagan sa mga serbisyo sa internet, pagproseso sa datos ug pagpalambo sa artificial intelligence o AI sa Russia.
