BUTUAN CITY – Gitugotan sa Senate Impeachment Court ang House Prosecution Panel nga ipakita ang mga summary ug table nga gi-andam sa ilang testigo gikan sa Bureau of Internal Revenue o BIR sa pagpadayon sa impeachment trial batok kang Vice President Sara Duterte.
Apan gidili una ni Presiding Officer ug Senator-Judge Francis “Chiz” Escudero ang pagpakita sa mismong source documents o orihinal nga mga rekord sa BIR nga naglangkob sa tax records ni Vice President Sara Duterte ug sa iyang bana nga si Atty. Manases “Mans” Carpio.
Gipahimangnoan ni Escudero si private prosecutor Atty. Erwin Matib nga kinahanglan una siyang mangayo og pagtugot sa korte sa dili pa ipakita ang bisan unsang source document.
Matud ni Escudero, mahimong ipakita ang mga summary ug table nga gibase sa mga dokumentong gi-subpoena, basta ipanghatag usab kini ngadto sa tanang partido ug mga senador nga naglingkod isip mga huwes sa impeachment court.
Giklaro usab sa presiding officer nga lahi ang proseso kung orihinal na nga mga rekord sa BIR ang ipakita, ilabina ang mga dokumentong sakop sa presidential letter nga nagtugot sa pagsubmite niini ngadto sa impeachment court.
Sa wala pa ipagawas ang maong desisyon, gihisgotan ni Escudero ang mi-aging impeachment trial ni kanhi Chief Justice Renato Corona, diin mitestigo kaniadto si BIR Commissioner Kim Jacinto-Henares kalabot sa tax records ug Statement of Assets, Liabilities and Net Worth o SALN ni Corona.
Sumala ni Escudero, wala gipakita niadtong panahona ang aktuwal nga tax returns o uban pang orihinal nga dokumento samtang nagtestigo ang saksi, bisan pa og gitugotan ang media nga mosulod ug makarekord sa mga panghitabo sa hearing.
