BUTUAN CITY – Gikumpirma ni kanhi Executive Secretary Victor Rodriguez nga ila nang gidangop ngadto sa Korte Suprema ang pag-usab sa Senate Impeachment Court sa conviction voting threshold batuk kang Vice President Sara Duterte.
Sa eksklusibong pakighinabi sa Bombo Radyo Philippines, gipadayag ni Atty Vic Rodriguez nga ilang gikwestyon ngadto sa Korte Suprema kung duna ba’y katungod o kagahom ang maong korte nga magsugyot og bisan unsa mang amyenda o rebisyon sa batakang balaud.
Dugang pa ni Rodriguez, ang gihimo matud pang exclusion sa Senate impeachment court sa voting threshold, makonsiderang pag-amyenda sa konstitusyon kansa unconstitutional.
Klaro matud pang nakalatid sa balaud nga ang Senado lang ang gihatagan og kagahom sa pagtaral ug pagdesisyon sa mga kaso sa impeachment tungod kay ang bugtong kagahom sa Senado, diha lamang sa rules of procedures sa impeachment trial. Na-establisar na matud pa ang rules of court bisan wala pa gipasakaan og impeachment case si VP Sara.
Giklaro pa niini nga ma-amyendahan lang ang batakang balaud pinaagi sa constituent assembly kon Con-Ass nga nanginahanglan og ¾ votes sa mga membro sa Kongreso. Anaa usab ang constitutional convention kon con-con ug ang people’s initiative.
Gipakita lang matud pa sa impeachment court ang grave abuse of discretion rason nga gihimo lamang usab niya ang iyang katungod isip usa ka Filipino nga protektahan ang batakang balaud pinaagi sa pagkwestyon sa gihimo sa impeachment court ngadto sa Korte Suprema.
