BUTUAN CITY- Napakyas ang Alas Pilipinas Women nga makauswag sa quarterfinals sa 2026 Asian Games Women’s Volleyball human mapildi sa Kazakhstan, sa skor nga 3-1, sa usa ka hugot ug kulbahinam nga duwa.
Nadaog sa Pilipinas ang unang set, 29-27, apan mibawi ang Kazakhstan ug gisungkit ang tulo ka sunod nga set, 26-24, 25-23, ug 25-19, aron selyohan ang kadaugan.
Bisan pa sa kapildihan, nanguna sa opensiba sa Alas Pilipinas sila Angel Canino ug Alyssa Solomon, diin nagtala si Canino og 24 puntos gikan sa 20 attacks, duha ka blocks ug duha ka aces, samtang nakadugang si Solomon og 20 puntos, lakip ang 15 attacks, upat ka blocks ug usa ka ace.
Kusgan ang gipakita sa Pilipinas sa unang mga set, apan nahimong dakong hinungdan ang epektibong serves ug blocks sa Kazakhstan, lakip ang mga service ace, samtang naglisod ang Alas Pilipinas sa reception ug pagpalambo sa ilang mga play.
Tungod sa four-set nga kapildihan, natapos na ang kampanya sa Alas Pilipinas Women ug wala na sila makauswag sa quarterfinals.
