BUTUAN CITY- Gipahugotan sa Bureau of Internal Revenue (BIR) ang kampanya batok sa ilegal nga vape ug mga produktong tabako samtang nagkadaghan ang mga konsumidor karong “Ber” months ug sa nagkaduol nga kapaskuhan.
Gimandoan ni Commissioner Charlito Martin Mendoza ang tanang enforcement units nga palig-onon ang pagbantay sa mga lugar nga gituohang gigamitan, gitipigan, gipang-apod-apodan ug gibaligya ang ilegal nga produkto, lakip ang koordinasyon sa ubang ahensya sa gobyerno alang sa mga operasyon.
Padayon usab ang BIR sa pagsamsam ug legal nga paglaglag sa mga ilegal nga vape ug sigarilyo, pagtino sa angay nga buhis, ug pagpasaka og mga kasong kriminal batok sa mga negosyanteng molapas sa balaod.
Nanawagan usab ang kawanihan sa mga negosyante ug publiko nga i-report ang bisan unsang kalihokan nga may kalabotan sa ilegal nga paghimo, pagtipig ug pagbaligya sa vape ug mga produktong tabako.
