BUTUAN CITY – Niadtong Mayo 4, 2021, nanganak si Halima Cissé sa Mali og siyam ka mga bata sa Ain Borja Clinic sa Casablanca, Morocco.
Kini ang unang nahibal-an nga kaso diin siyam ka mga bata, o nonuplets, ang tanan naluwas human sa pagpanganak.
Sa sinugdan, nagtuo ang mga doktor sa Mali nga pito ka mga bata ang gidala ni Halima.
Apan niadtong Marso 30, 2021, ubos sa mando sa gobyerno, gipalupad siya ngadto sa usa ka klinika sa Casablanca nga nagtanyag og espesyal nga pag-atiman sa medisina. Didto nadiskobrehan nga siyam diay ka mga bata ang iyang gidala.
Gikumpirma sa direktor sa klinika nga si Youssef Alaoui nga nanganak si Halima nga wala pa sa hustong panahon niadtong Mayo 4, 2021, sa ika-30 ka semana sa iyang pagmabdos, pinaagi sa Caesarean section.
Ang matag usa sa lima ka babaye ug upat ka lalaki mitimbang tali sa 500 gramos ug usa ka kilo.
Gibalhin dayon ang mga bata ngadto sa mga incubator ug nagpabilin ubos sa pag-atiman sa pediatric neonatologist sa klinika nga si Dr. Khalil Msaif sulod sa pipila ka bulan human sa ilang pagkahimugso.
Sumala pa sa amahan nga si Abdelkader Arby, nga malipayon kaayu silang tanan apan dili matud pa sayon nga patulugon silang tanan sa samang higayon, ilabina kay kinahanglan nila nga gakson silang tanan aron makatulog tungod kay ganahan kaayo sila nga gakson samtang matulog.
