BUTUAN CITY – Giklaro sa National Historical Commission of the Philippines kon NHCP ang kamahinungdanon sa pagsaulog sa National Heroes Day.
Matod ni NHCP History Researcher II Aljon Concillado, daghang Pilipino ang giila isip mga bayani, lakip sila Jose Rizal, Andres Bonifacio, Emilio Aguinaldo, Apolinario Mabini ug Marcelo H. del Pilar, lakip pa ang uban pang dakog nahimong kontribusyon sa kasaysayan ug kagawasan sa nasud.
Dungan niini, importante ang National Heroes Day aron atong mailhan ug mapasalamatan ang nagkalain-laing Pilipinong bayani, lakip na ang mga dili kaayo nailhan o panagsa ra hisgutan ug matun-an sa mga eskwelahan.
Bisan pa man nga daghan ang nagtuo nga si Dr. Jose Rizal ang nasudnong bayani sa Pilipinas, giklaro sa NHCP nga wala’y balaod nga pormal nga nagdeklarar kaniya, o kang bisan kinsa, isip opisyal nga national hero sa nasud.
Dugang pa ni Concillado nga dili angay nga limitado sa pipila lamang ka ngalan ang pag-ila sa mga bayani, tungod kay daghan pang Pilipino ang naghalad sa ilang kahibalo, kusog, panahon, kagawasan ug bisan kinabuhi alang sa nasud.
Gidasig usab ang publiko nga padayon nga hinumdoman ug pasidunggan ang tanang Pilipino nga naghalad sa ilang kaugalingon alang sa kaayohan, kagawasan ug kaugmaon sa nasud.
