BUTUAN CITY – Nagtuo si Armed Forces of the Philippines (AFP) spokesman alang sa West Philippine Sea nga si Rear Admiral Roy Vincent Trinidad nga gigamit sa China ang isyu sa flood control ug impeachment batok kang Vice President Sara Duterte aron samokon ug gub-on ang gobyerno.
Sigon ni Trinidad, base sa ilang social media monitoring ug analytics, aduna’y impluwensya sa langyaw sa mga isyu ug daw ginadula-dulaan niini ang duha ka maong isyu aron makamugna og kagubot.
Gawas sa isyu sa West Philippine Sea, nalambigit usab sa diskusyon ang pag-raid sa mga otoridad sa Sanja Steel Corp. niadtong Mayo 15, kondiin 69 ka Chinese workers ang nadakpan.
Gipakita usab sa China nga daotan ang pipila ka opisyal sa gobyerno, sama sa ilang gibuhat kang Philippine Coast Guard spokesman alang sa WPS nga si Rear Admiral Jay Tarriela, tungod sa iyang hugot nga pagsupak sa agresibong mga lihok sa China sa kadagatan sa nasod.
Nagtuo usab sila nga dili mohunong ang maong propaganda sa China, ilabina kay nagkaduol na ang 2028 elections.
