BUTUAN CITY- Mingkabat ngadto sa 37 ka tao ang patay ug dul-an 400 ang gipabakwit human maigo sa drone strike sa Russia ang usa ka bodega sa armas alang sa militar sa Ukraine duol sa residential area sa Myla, sa western Kyiv.
Sumala ni Ukrainian President Volodymyr Zelensky, mibuto ang mga bala, mina ug drones nga gitipigan sa depot, nga nakadaot sa mga kabtangan sa palibot, lakip ang usa ka pasilidad alang sa mga tigulang ug mga tawo nga adunay kapansanan.
Kapin 40 usab ang nasamdan, lakip ang upat ka bata, samtang gisugdan na ang imbestigasyon sa giingong pagpasagad sa mga opisyal sa pagtipig sa mga eksplosibo duol sa mga kabalayan.
Samtang nagpadayon ang mga pag-atake sa duha ka kampo, nakatala usab og mga kaswalti sa Kyiv ug ubang bahin sa Ukraine, samtang sa Russia, duha ang namatay ug 25 ang nasamdan sa mga pag-atake sa Belgorod ug Rostov.
