BUTUAN CITY – Gila-umang musaka pa ang natalang 157 ka mga tawong namatay sa Nepal ug kapin sa 400 ka mga turista ang nawala human ang dakong flashfloods og rock ug mudslides nga natigayon sa Rasuwa District sa Nepal-Tibet border.
Ang mga na-missing nga turista gilangkuban sa kapin 100 gikan sa India, 54 gikan sa US og 33 sa United Kingdom samtang kapin 100 usab ang taga-Nepal mismo, base sa Tourist Board sa maong nasud.
Nasayran nga ang dakong flash flood sa natigayon sa amihanang parte sa Nepal ug utlanan sa Tibet, China nga mikalas usab og tulo ka mga tawo rason nga 160 ang tanang patay sa maong kalamidad.
Base sa mga opisyal nga taho, nagsugod ang trahedya sa dihang miuyog ang usa ka magnitude 4.4 nga linog nga nagdala og dakong landslide.
Ang midahiling yuta ug mga dagkong bato mibara sa natural nga agi-anan sa tubig sa Bhote Koshi River duol sa utlanan sa Tibet.
Sa dihang hingpit nga mibigay ang nabarang yuta, paspas nga midagayday ang dako kaayong volume sa tubig ug lapok padulong sa mga silingang komunidad sa suba.
Lakip sa mga nangawala ang gatosan ka mga lokal nga residente, mga langyaw nga turista, ug pipila ka miyembro sa security forces human gipadpad sa baha ang ilang outpost.
Nagdala usab kini og halapad nga pagkapalong sa kuryente sa mga ubang distrito human mangahunlak ang mga nag-unang dalan, tulay, ug mga hydropower plant.
Sa kasamtangan, nagpahigayon na og halapad nga search and rescue operations ang Nepal Army kauban ang mga emergency response team gamit ang mga helicopter ug specialized equipment.
Naka-high alert na usab ang tanang komunidad sa kilid sa suba samtang padayong gimonitor sa mga awtoridad ang agas sa tubig gikan sa border.
