BUTUAN CITY– Gideklarar sa Senate impeachment court si Lemuel Ortonio, Assistant Secretary ug Assistant Chief of Staff sa Office of the Vice President (OVP), isip hostile witness sa ika-18 nga adlaw sa impeachment trial ni Vice President Sara Duterte.
Gipahimutang ni Senate impeachment court presiding officer Francis “Chiz” Escudero ang maong ruling human ming-uyon si Ortonio kansa empleyado pa kini sa OVP ug mahimo kining mawad-an og trabaho kung ma-impeach ug matangtang sa katungdanan si Duterte tungod coterminous ang iyang appointment.
Tungod sa maong ruling, gitugotan ang prosecution nga mangutana og leading questions, apan dili misleading questions. Sa direct examination, sigon sa private prosecutor nga si Atty. Mae Divinagracia nga ang awtoridad ug pag-apruba ni Duterte makita sa mga importanteng dokumento gikan sa request hangtod sa liquidation sa confidential funds, ug giakusahan usab ang OVP sa paggamit sa maong pondo nga walay lehitimong confidential public purpose.
Gikuwestiyon usab sa prosecution ang P500 milyon nga pondo alang sa seguridad sa bise presidente, samtang gihulagway niini nga “sham” ang mga rason sa paggamit sa confidential funds ug giingon nga ang kakulang sa accounting mahimong maghatag og presumption sa misappropriation.
Sa depensa, sigon usab ni Atty. Kristine Ferrer nga ang mga alegasyon sa prosecution, mga konklusyon lamang, espekulasyon ug teorya nga wala pa mapamatud-an sa impeachment court, apan mipasalig nga ilang i-cross-examine si Ortonio aron masuta o masupak ang mga alegasyon batok kang Duterte.
