BUTUAN CITY- Gipa-abot nga mokunhod og hangtod P4 kada litro ang presyo sa diesel sa Pilipinas sa sunod semana human sa dakong pagsaka niini karong semanaha, tungod sa paghinay sa kabalaka sa merkado sa posibleng epekto sa panagbangi tali sa Estados Unidos ug Iran.
Sumala ni Jetti Petroleum president Leo Bellas, mahimong mokunhod ang diesel og P3.50 hangtod P4 matag litro, samtang ang gasolina mahimong moubos og P0.25 hangtod P0.75 kada litro base sa lihok sa presyo sa internasyonal nga merkado.
Sigon niini, nakatabang sa pagpaubos sa presyo ang mas ubos kaysa gipaabot nga epekto sa mga silot sa Estados Unidos, paglaum sa pagbalik sa negosasyon ug pag-abli pag-usab sa Strait of Hormuz, ingon man ang dugang nga suplay sa refined petroleum products gikan sa China, Estados Unidos ug India, apan mahimo gihapong mapugngan ang gidak-on sa rollback kung magpadayon ang pagsaka sa world oil prices tungod sa bag-ong mga kalamboan sa tensiyon tali sa US ug Iran.
