BUTUAN CITY – Gipadayag ni Atty Sonny Matula nga ang Office of the Ombudsman na ang magdesisyon kung tinuod ba o dili ang pag-recant kon pag-atras ni Orly Guteza sa una niining akusasyon nga nag-deliver siya og minaleta nga mga kwarta ngadto kang kanhi House Speaker Martin Romualdez.
Gipasabot sa manlalaban nga sa preliminary investigation, ang basehan lang mao ang probable cause gamit ang pipila ka mga ebidensya ug testimoniya kalabot sa kremin nga nahitabo batuk sa responsable ug dili ang proof beyond reasonable doubt.
Alang kang Atty Matula, kung duna’y kwestyon sa mga testimoniya ug kredibilidad sa mga saksi, masubay na lang matud pa kini sa trial proceedings apan kinahanglang makasuhan gayod ang mga responsable.
Sa panig usab sa labor sector, gipasabot ni Atty Matula nga importanteng makompleto ang imbestigasyon sa anumalusong mga flood control projects tungod kay bisan sa kadako sa kwarta sa gobyerno nga nawala kansa gitagana sa maong mga proyekto, padayon gihapong nasinatian sa katawhan ang mga pagbaha.
Angayan matud pang seryusuhon sa administrasyong Marcos ang imbestigasyon ug paggukod sa mga gitudlong nalambigit sa kurapsyon ug dili kay ang ila lang mga ka-atbang sa pulitika ang ilang hatagan og atensyon.
