BUTUAN CITY- Gipa-imbestigahan na sa kapulisan ang usa ka anonymous nga post sa social media kansa giisip nga hulga batok sa Cabadbaran City National High School ug sa Bishop Hadin Institute, human kini makahatag og kabalaka sa mga estudyante, ginikanan ug komunidad.
Sumala ni Cabadbaran City Mayor Judy Chin Amante, dili angay pasagdan ang maong post bisan pa man og posible nga binuang o joke lamang ang tuyo sa nag-post, tungod ang mga hulga nga sama niini mahimong moresulta sa alarma ug kahadlok sa publiko.
Giawhag usab sa mayor, ilabina ang mga kabatan-onan, nga magmatngon ug mahimong responsable sa ilang mga gipang-post sa social media ug likayan ang mga pahayag nga adunay hulga o makapahadlok sa uban, tungod sa posibleng seryosong sangpotanan niini.
Padayon usab ang imbestigasyon sa kapulisan aron mahibal-an kung kinsa ang responsable sa maong post ug matino ang tinuod nga kahimtang niini, samtang gipahinumdoman ang tanan nga magmatngon ug responsable kanunay, online man o offline.
