BUTUAN CITY- Padayon nga gimonitor sa mga eksperto ang tulo ka bagyong anaa gawas sa Philippine Area of Responsibility kon PAR.
Lakip niini ang Typhoon Saudel kinsa kataposang nasigpatan sa distansya nga 2,555 kilometro sa sidlakan sa Northern Luzon.
Aduna kini gikusgon sa hangin nga mo-abot sa 150 kilometro matag oras duol sa sentro, paghuros nga mohapak sa 185 kilometro matag takna, ug minglihok padulong amihanan-kasadpan sa gikusgon nga 15 kilometro matag oras.
Samtang gibantayan usab ang usa ka tropical depression sa gilay-on nga 1,055 kilometro sa sidlakang Eastern Visayas.
Aduna kini gikusgon sa hangin nga 45 kilometro matag oras duol sa sentro,paghros nga mo-abot usab sa 55 kilometro matag oras, ug paspas nga minglihok pa-amihanan-kasadpan sa gikusgon nga 30 kilometro matag oras.
Anaa gawas usab sa teritoryo sa nasud ang Tropical Depression Gaenari nga nakit-an sa distansyang 660 kilometro sa amihanang northeast sa Itbayat, Batanes.
Aduna kini gikusgon sa hangin nga 55 kilometro matag oras, paghuros nga mo-abot sa 70 kilometro matag oras, ug kasamtangang hinay nga minglihok padulong sa amihanan-kasadpan.
